Ջերմուկն այն ուղղությունն է, որտեղ հակառակորդը ունեցել է որոշակի հաջողություններ և մխրճվել 8,5 կմ լայնության ճակատով մինչև 7,5 կմ խորությամբ։ Այս մխրճումները իրականացվել են խմբերով ու ջոկատներով, դրանցից մի քանիսը այժմ գտնվում են մեր ստորաբաժանումների շրջափակման մեջ։
Այս մասին այսօր Ջերմուկ քաղաքում Հայաստանում հավատարմագրված դիվանագիտական կորպուսի ներկայացուցիչների հետ հանդիպման ժամանակ ասաց ՀՀ ԶՈՒ գլխավոր շտաբի պետ Էդվարդ Ասրյանը:
Ըստ նրա՝ ներկայումս Ադրբեջանի զինված ուժերի խմբերը գտնվում են Ջերմուկ քաղաքից 4,5 կիլոմետր հեռավորության վրա, նախկինում 11 կիլոմետր հեռավորության վրա էին:
«Հարվածների ժամանակ Ադրբեջանը կիրառել է ինչպես ռեակտիվ հրետանի, այնպես էլ անօդաչու թռչող սարքեր։ Մասնավորապես՝ Ջերմուկ քաղաքում հարված է հասցվել ճոպանուղուն, այդ տարածքում կան մանկական հրապարակներ: Քանի որ տարհանում իրականացված չէր, այնտեղ այդ ժամանակ եղել են տարբեր երկրների բնակիչներ և մեր ժողովուրդը։ Ներկա դրությամբ Ջերմուկ քաղաքում այլ պետությունների ներկայացուցիչներ չկան, բացակայում են»,- ասաց նա։
Հանցագործություններն իրականացվել են բոլոր ուղղություններով։ Ադրբեջանի Հանրապետության զինված ուժերը, որպես նշանակետեր, ընտրել են նաև քաղաքացիական ենթակառուցվածքները։
