«Ինձ համար մեծ պատիվ է այստեղ լինել: Ես Միացյալ Նահանգների Ներկայացուցիչների պալատի առաջին խոսնակն եմ, որն այցելում է Հայաստան»:
Այս մասին ԱԺ նախագահ Ալեն Սիմոնյանի հետ համատեղ հայտարարության ժամանակ ասաց ԱՄՆ Կոնգրեսի Ներկայացուցիչների պալատի խոսնակ Նենսի Փելոսին՝ նշելով, որ արդեն այսօր իրենց պատվիրակությունը բավական արդյունավետ հանդիպումներ է ունեցել:
«Վերահաստատեցինք ԱՄՆ Կոնգրեսի հանձնառությունը՝ անվտանգային, տնտեսական, ժողովրդավարական հարցերում Հայաստանում և տարածաշրջանում աշխատելու ուղղությամբ:
Միացյալ Նահանգների Կոնգրեսն առաջատար դեր է ունեցել Հայոց ցեղասպանության ճանաչման հարցում, 2019 թվականին այն օրենսդրորեն ընդունվեց և նախագահ Բայդենի կողմից հաստատվեց։ Սա երկկուսակցական օրենք էր, և երկար ժամանակ Կոնգրեսում այս հարցի շուրջ մենք աշխատում էինք։ Մենք երախտապարտ ենք նախագահ Բայդենին այդ օրենքը ստորագրելու համար և շնորհակալ ենք, որ նա այս տարի հրավիրեց Հայաստանի վարչապետին՝ մասնակցելու Ժողովրդավարության հայտնի գագաթնաժողովին», – նշեց Փելոսին:
Հիշեցնենք՝ ՀՀ ԱԺ նախագահ Ալեն Սիմոնյանն ընդունել է պաշտոնական այցով Հայաստան ժամանած ԱՄՆ Ներկայացուցիչների պալատի նախագահ Նենսի Փելոսիի գլխավորած պատվիրակությանը: Հանդիսավոր ընդունելությանը հաջորդել է Սիմոնյան-Փելոսի առանձնազրույցը: Զրուցակիցներն այնուհետև միացել են ընդլայնված կազմով քննարկմանը:
ՀՀ ԱԺ նախագահ Ալեն Սիմոնյանը ԱՄՆ Ներկայացուցիչների պալատի խոսնակ Նենսի Փելոսիի հետ հանդիպումից հետո հանդես է եկել հայտարարությամբ:
