Բաց հասարակության հիմնադրամները (ԲՀՀ) կոչ են անում միջազգային հանրությանը անհապաղ քայլեր ձեռնարկել՝ ամրապնդելու հրադադարը Հայաստանի և Ադրբեջանի սահմանին ինտենսիվ մարտերի բռնկումից հետո, որոնց հետևանքով զոհվել է ավելի քան 200 զինծառայող:
Ինչպես ասվում է Բաց հասարակության հիմնադրամների հայտարարության մեջ, որը հրապարակվել է կազմակերպության Twitter-ի միկրոբլոգում, անցած շաբաթվա սկզբին ադրբեջանական ուժերը հրետակոծել են Հայաստանի տարածքը, ներառյալ քաղաքացիական ենթակառուցվածքները, իսկ այնուհետև գրավել տարածքներ Հայաստանի՝ միջազգայնորեն ճանաչված սահմանի ներսում։
«Այն, ինչ մենք տեսնում ենք, մեծ երկրի կողմից ավելի փոքր, քաղաքականապես մեկուսացված հարևանի դեմ ագրեսիայի ևս մեկ ակնհայտ օրինակ է», – հայտարարել է Բաց հասարակության հիմնադրամների Եվրոպայի և Կենտրոնական Ասիայի տարածաշրջանի գործադիր տնօրեն Դանիելա Շվարցերը:
«Մենք կոչ ենք անում ԵՄ-ին և ՄԱԿ-ին՝ քայլեր ձեռնարկել երաշխավորելու, որ ադրբեջանական զորքերը լքեն Հայաստանը և մարտերը չվերսկսվեն, այդ թվում՝ հրադադարի մոնիտորինգի խմբերի տեղակայման և Բաքվի վրա դիվանագիտական ճնշման միջոցով, որպեսզի վերջինս վերադառնա խաղաղ բանակցություններին», – ասված է հայտարարությունում:
“We urge the EU and the UN to take steps to ensure that Azerbaijani troops leave Armenia and the fighting does not resume, including through the deployment of ceasefire monitoring teams, and through diplomatic pressure on Baku to return to peace talks.” @D_Schwarzer (5/5) pic.twitter.com/ZQez1zLrLw
— Open Society Foundations (@OpenSociety) September 17, 2022
