Թուրքիայի խոշորագույն բանկը հրաժարվել է աշխատել ռուսական «Միր» վճարային համակարգի հետ

Թուրքական İşbank (Türkiye İş Bankası) բանկը հայտարարել է, որ դադարեցրել է աշխատանքը ռուսական Mir վճարային համակարգի հետ։ Այս մասին ասվում է ընկերության հայտարարության մեջ, որը մեջբերում է թուրքական Bloomberg HT հեռուստաալիքը։

Բանկը հայտնել է, որ իրենք նման որոշում են կայացրել այն պատճառով, որ ավելի վաղ՝ սեպտեմբերին, ԱՄՆ գանձապետարանը սպառնացել էր պատժամիջոցներ կիրառել այն ընկերություններին, որոնք օգնում են Ռուսաստանի իշխանություններին օգտագործել «Միր» քարտերը Ռուսաստանի Դաշնությունից դուրս։

Սեպտեմբերի 19-ի երեկոյան İşbank բանկոմատները դադարեցրել են թուրքական լիրայի թողարկումը ռուսական Mir վճարային համակարգի քարտերից, հաղորդում է ՏԱՍՍ-ի թղթակիցը։

İşbank-ը ակտիվներով Թուրքիայի ամենամեծ մասնավոր բանկն է։

Financial Times-ն ավելի վաղ հայտնել էր, որ ԱՄՆ-ն և ԵՄ-ն ուժեղացրել են ճնշումը Թուրքիայի վրա՝ վախենալով, որ Ռուսաստանը կարող է շրջանցել արևմտյան պատժամիջոցները թուրքական բանկային հատվածի միջոցով։ Հրատարակության համաձայն՝ ԱՄՆ իշխանությունները հայացքն ուղղել են թուրքական բանկերին, որոնք աշխատում են «Միր» վճարային համակարգով։

Երկրի հինգ խոշոր բանկերը, այդ թվում՝ Vakifbank-ը, Ziraat Bank-ը, DenizBank-ը, Halkbank-ը և İşbank-ը, աշխատել են Թուրքիայում Mir համակարգի հետ: Սեպտեմբերին TourDom.ru-ն գրել էր, որ թուրքական որոշ հյուրանոցներ դադարեցրել են Mir քարտերի ընդունումը այն պատճառով, որ Vakif Bank-ը դադարեցրել է գործարքները Mir-ի հետ։

Օգոստոսի սկզբին Թուրքիայի նախագահ Ռեջեփ Թայիփ Էրդողանը ՌԴ նախագահ Վլադիմիր Պուտինի հետ հանդիպումից հետո հայտարարել էր, որ «Միր» համակարգը խթանում է երկու երկրների միջեւ զբոսաշրջությունը։

Աղբյուրը՝ Meduza.io