Ի թիվս այլ համայնքների՝ ՏԻՄ ընտրությունների է պատրաստվում նաև Բյուրեղավան համայնքը։ Համայնքի գործող ղեկավար Հակոբ Բալասյանը, ցանկանալով պահել համայնքապետի պաշտոնը՝ փորձել է անդամակցել ՔՊ-ին և որպես թեկնածու առաջադրվել ՔՊ ցուցակով։ Մեր աղբյուրների հավաստմամբ՝ նա պաշտոնապես դիմել է ՔՊ-ին և Ազգային ժողովում հանդիպել կուսակցության վարչության անդամներին՝ իր թեկնածությունը հաստատելու համար։
Բայց ՔՊ վարչության անդամները, որոնց թվում են եղել Արայիկ Հարությունյանը, Արսեն Թորոսյանը, Հակոբ Արշակյանը և Ռոմանոս Պետրոսյանը՝ մերժել են Հակոբ Բալասյանին։ Բալասյանին մերժելու պատճառը նրա խայտաբղետ կուսակցական անցյալն է․ նախ՝ ՕԵկ, ապա՝ ԲՀԿ, այնուհետև՝ ՀՀԿ, այժմ էլ՝ ՔՊ մտնելու ցանկություն։ Իշխող ուժից մերժում ստանալուց հետո 14 տարի համայնքը ղեկավարած Բալասյանը որոշում է առաջադրվել ԲՀԿ և «Դեմոկրատական Այլընտրանք» կուսակցությունների կազմած «Միասնություն» դաշինքով։
Ընդ որում՝ հիմա Բալասյանը ինքն է լուրեր տարածում, թե իբր ՔՊ-ն է իրեն դիմել՝ առաջադրվելու իր ցուցակով, ու մերժում ստացել։ Ավելին՝ ադրբեջանական վերջին հարձակումներից հետո Ազգային ժողովի դիմաց հավաքվածների և ԱԺ ցանկապատը ջարդողների թվում էր նաև Հակոբ Բալասյանի թիմի գրեթե ողջ ակտիվը։
