Մեկնարկել է ՀՀ կառավարության հերթական նիստը: Այն վարում է փոխվարչապետ Համբարձում Մաթևոսյանը, քանի որ վարչապետ Նիկոլ Փաշինյանը աշխատանքային այցով գտնվում է ԱՄՆ-ում՝ Նյու Յորքում: Կառավարության ղեկավարը սեպտեմբերի 22-24-ը մասնակցելու է ՄԱԿ-ի Գլխավոր Ասամբլեայի 77-րդ նստաշրջանի բարձրաստիճան հատվածին, որի ընթացքում հանդես կգա ելույթով:
Քննարկվող հարցերից մեկը Հյուսիս-հարավ ճանապարհային միջանցքի ներդրումային ծրագրի շրջանակներում Արագածոտնի և Շիրակի մարզերի 33 հողամաս գերակա շահ ճանաչելն էր:
«Առաջարկում ենք ծրագրի 3 բաղադրիչում իրականացրել մի շարք հողամասերի գերակա շահ ճանաչելու գործընթաց: Սա շարունակական գործընթաց է, պարբերաբար իրականացվում է: Հիմա այս հատվածում ունենք Հյուսիս-հարավ ճանապարհին մուտքերի որոշակի կարգավորումների կարիք և այդ հատվածներում գերակա շահ ճանաչելու անհրաժեշտություն: Ընդհանուր առմամբ, երկու մարզում 33 հողակտորի մասին է խոսքը, որպեսզի աշխատանքները բնականոն հունով ընթանան»,- մանրամասնեց տարածքային կառավարման և ենթակառուցվածքների նախարար Գնել Սանոսյանը:
Ծրագիրը հաստատվեց:
Նշենք, որ խոսքը Արագածոտնի Թալին համայնքի Ակունք, Մաստարա բնակավայրերի և Շիրակի մարզի Անի համայնքի Լանջիկ բնակավայրի տարածքում գտնվող հողամասերի մասին է:
