Այժմ տարածքը սահմանազատված է, իրականացվում են մաքրման աշխատանքներ: Այս մասին Կառավարության նիստի ընթացքում տեղեկացրեց ԱԻ նախարարի տեղակալ Արտյուշ Գրիգորյանը՝ անդրադառնալով երեկ «Սուրմալուի» տարածքում տեղի ունեցած փլուզմանը:
ՀՀ փոխվարչապետ Համբարձում Մաթևոսյանն էլ հայտնեց, որ Երևանի քաղաքապետ Հրաչյա Սարգսյանի հետ քննարկում է ունեցել հարցի վերաբերյալ:
«Տեղյակ եմ նաև, որ քննարկումներ են ընթանում սեփականատիրոջ հետ: Խնդրում եմ աշխատանքներին հետևողական լինել, որպեսզի սահմանազատված հատվածում մենք նմանատիպ այլ դեպք չարձանագրենք»,- ասաց փոխվարչապետը:
ՀՀ քաղաքաշինության կոմիտեի նախագահ Արմեն Ղուլարյանն առաջարկեց Երևանի «Սուրմալու» առևտրի կենտրոնի վնասված շինությունը շատ արագ քանդել և մաքրել տարածքը:
«Այդ կառույցի հետ կապված առաջարկում եմ շատ արագ քանդման թույլտվություն տրվի և սեփականատիրոջ միջոցներով մաքրվի տարածքը: Կամ քաղաքապետարանը կարող է նախաձեռնել, որից հետո սեփականատիրոջ միջոցներից դա կարող է փոխհատուցվել»,-ասաց Ղուլարյանը:
