Միացյալ ազգերի կազմակերպության Անվտանգության խորհուրդը Ուկրաինայի հարցով հերթական նիստը կանցկացնի սեպտեմբերի 27-ին:
Այս մասին հայտնի է դառնում ՄԱԿ ԱԽ կայքում հրապարակված ծրագրից: Նշվում է, որ նիստը նախատեսված է Նյու Յորքի ժամանակով օրվա երկրորդ կեսին, ստույգ ժամը չի նշվում։
Ուկրաինայի հարցով նիստն ԱՄՆ-ն ու Ալբանիան են խնդրել՝ կապված Դոնեցկի և Լուգանսկի ժողովրդական հանրապետություններում, ինչպես նաև Խերսոնի և Զապորոժիեի շրջաններում հանրաքվեների անցկացման հետ։
Հիշեցնենք՝ Դոնեցկի և Լուգանսկի Ժողովրդական Հանրապետությունների, ինչպես նաև Զապորոժիեի և Խերսոնի շրջանների վարչակազմերը որոշել են հանրաքվեներ անցկացնել Ռուսաստանին՝ որպես դաշնության սուբյեկտներ միանալու վերաբերյալ։ Այս բոլոր տարածքներում քվեարկությունը սկսվել է սեպտեմբերի 23-ին և ավարտվելու է սեպտեմբերի 27-ին։
