Ղազախստանում մեկնարկում են ՀԱՊԿ արագ արձագանքման ուժերի զորավարժությունները

Ղազախստանի Ժամբիլի և Ալմաթիի մարզերում այսօրվանից մեկնարկել են և մինչև հոկտեմբերի 8-ը կշարունակվեն Հավաքական անվտանգության պայմանագրի կազմակերպության արագ արձագանքման հավաքական ուժերի զորավարժություններ՝ «Փոխգործակցություն-2022», «Որոնում-2022», «Էշելոն-2022»  անվանումներով:

Այս մասին հաղորդել է Ղազախստանի ՊՆ մամուլի ծառայությունը։

Գերատեսչության փոխանցմամբ՝ մինչև հոկտեմբերի 8-ը անցկացվելիք զորավարժությունների ընթացքում «մշակվելու են պարետային ծառայության, հակաօդային պաշտպանության և բազմակողմանի ապահովման հարցերը»:

Ավելի վաղ ՀԱՊԿ միացյալ շտաբը հայտնել էր, որ ՀԱՊԿ արագ արձագանքման հավաքական ուժերի հետ «Փոխգործակցություն-2022» հրամանատարաշտաբային զորավարժությունները նախատեսում են մշակել Կենտրոնական Ասիայի տարածաշրջանում զինված հակամարտության տեղայնացման ուղղությամբ կոլեկտիվ անվտանգության համատեղ օպերացիայի նախապատրաստման և անցկացման հարցերը։

Զորավարժություններին առաջին անգամ կմասնակցի հավաքական ուժերի նոր ստորաբաժանում՝ ռադիացիոն, քիմիական, կենսաբանական պաշտպանության և բժշկական աջակցության համատեղ կազմավորումը։
 
«Որոնում-2022» հատուկ զորավարժության ընթացքում կմշակվեն ՀԱՊԿ անդամ պետությունների հետախուզական մարմինների ուժերի և միջոցների կողմից հետախուզության կազմակերպման և ներդրման հարցերը՝ ՀԱՊԿ արագ արձագանքման հավաքական ուժերի շահերից ելնելով։

«Էշելոն-2022» հատուկ զորավարժությունն էլ ուղղված է նյութատեխնիկական ապահովման կազմակերպման հարցերի մշակմանը։

Հիշեցնենք՝ ՀԱՊԿ-ին անդամակցում են Ռուսաստանը, Հայաստանը, Բելառուսը, Ղազախստանը, Ղրղըզստանը և Տաջիկստանը: