Այսօր մի շարք քաղաքական և հասարակական գործիչներ ՀՀ արտաքին գործերի նախարարության դիմաց հավաք են իրականացրել «ՀԱՊԿ-ից դուրս» խորագրով: Վերջիններս ԱԳ նախարար Արարատ Միրզոյանին նամակ-պահանջ են հանձնել՝ պահանջելով դուրս գալ ՀԱՊԿ-ից:
«Հանուն հանրապետություն» կուսակցության անդամ Ռուբեն Մեհրաբյանը նշել է, որ եթե համարվում ես ՌԴ-ի դաշնակիցը, ապա քեզ չեն օգնելու: Նա հիշեցրել է Նիկոլ Փաշինյանի այն խոսքերը, որ կան երկրներ, որոնք պատրաստ են մեզ զինել, սակայն որոշ պետություններ թույլ չեն տալիս:
«Հիմա ես հարց եմ տալիս՝ դուք ո՞ւմ շունն եք, որ չթողնեք մեզ զինվել կամ չզինվել: Այստեղ է, որ պետք է դրսևորվի քաղաքական կամք, վճռականություն և բացառապես սեփական շահերի հետապնդում: Քանի մենք Ռուսաստանի դաշնակիցն ենք, մեզ պատրոն չեն տալու: Կկարեկցեն, հումանիտար օգնություն կտան, մի քիչ էլ փող կտան, բայց զենք չեն տա: Համաշխարհային չարիքի դաշնակցին չեն զինում»,- նկատել է քաղաքագետը:
Նույն կուսակցության ղեկավար Արման Բաբաջանյանն էլ իր ելույթում ընդգծել է, որ այն իրավիճակը, որում ՀՀ-ն այս պահին գտնվում է, հնարավոր է հաղթահարել բացառապես եթե դադարեցվի ՀՀ-ի՝ ՀԱՊԿ-ին անդամակցությունը:
«Սա արդեն ՀՀ-ի գոյության հարցն է: Մենք գտնվում ենք ռազմաքաղաքական մի դաշինքի կազմում, որի անդամները չեն ճանաչում Հայաստանի տարածքային ամբողջականությունը: Դրա վերաբերյալ որևէ դատապարտող հայտարարություն մեր, այսպես կոչված, դաշնակիցները չեն կատարել: Նույնիսկ գեթ մեկ անգամ ցավակցական խոսք չեն ուղղել սեպտեմբերի 13-ին ՀՀ սահմանների նկատմամբ գործված ոտնձգության հետևանքով զոհված քաղաքացիական անձանց վերաբերյալ»,- ասել է քաղաքական գործիչը:
Բաբաջանյանի խոսքով՝ ՀՀ-ին նման դաշնակիցներ պետք չեն, որոնք Հայաստանի գլխին նոր սպառնալիքներ են բերում. «Կա՛մ ՀԱՊԿ, կա՛մ Հայաստան: Մենք չենք կարող մեր զավակների կյանքի գնով շարունակել երկչոտության այս խայտառակ արշավը, որի գինը թանկ ենք վճարում»:
