Արցախի Հանրապետության նախագահ Արայիկ Հարությունյանը Ռուսաստանում տեղի ունեցած ողբերգական պատահարի զոհ դարձած աշակերտների և մեծահասակների հարազատներին ու մերձավորներին ցավակցական խոսք է հղել: Ուղերձում ասված է.
«Արցախում խոր ցավով տեղեկացանք Ռուսաստանի Դաշնության Ուդմուրտիայի Հանրապետության մայրաքաղաք Իժևսկի դպրոցներից մեկում տեղի ունեցած հրաձգության մասին, որը խլեց տասնյակ մարդկային կյանքեր։
Արցախի Հանրապետության ժողովրդի և անձամբ իմ անունից ցավակցություն ու զորակցություն եմ հայտնում ողբերգական պատահարի զոհ դարձած աշակերտների և մեծահասակների հարազատներին ու մերձավորներին։ Շուտափույթ ապաքինում եմ մաղթում բոլոր տուժածներին։
Այս ծանր պահին եղբայրական ռուս ժողովրդի հետ միասին կիսում ենք կորստի վիշտն ու ցավը»:
Հիշեցնենք, որ ՌԴ Ուդմուրտիայի շրջանի Իժևսկ քաղաքում՝ Պուշկինսկայա փողոցի թիվ 88 դպրոցում, կրակոցներ էին հնչել:
