Լեհաստանի Գոլենիով քաղաքում տեղի է ունեցել Լեհաստանի և Դանիայի միջև Baltic Pipe գազատարի բացման արարողությունը։ Միջոցառմանը ներկա էին Լեհաստանի նախագահ և վարչապետ Անջեյ Դուդան և Մատեուշ Մորավիեցկին, ինչպես նաև Դանիայի վարչապետ Մետե Ֆրեդերիկսենը։
«Գազի ոլորտում ռուսական գերակայության դարաշրջանը մոտենում է ավարտին, մի դարաշրջան, որը նշանավորվում է շանտաժով, սպառնալիքներով և շորթումներով», – մեջբերում է Euronews-ը Մատեուշ Մորավիեցկիի խոսքերը։
Baltic Pipe-ը Լեհաստան և հարևան երկրներ գազ կմատակարարի Նորվեգիայից։ Եվրահանձնաժողովի հայտարարության համաձայն՝ գազատարը տարեկան կկարողանա մատակարարել մինչև 10 միլիարդ խորանարդ մետր գազ։
Մատակարարումների մեկնարկը նախատեսված է 2022 թվականի հոկտեմբերի 1-ին, և դանիական Energinet էներգետիկ ընկերությունն ասում է, որ մինչև նոյեմբերի վերջ գազատարը կկարողանա աշխատել ամբողջ հզորությամբ։
Լեհաստանը տարեկան սպառում է մոտ 20 միլիարդ խորանարդ մետր գազ։ Նախկինում այս ծավալի մինչև կեսը Ռուսաստանը մատակարարում էր Յամալ-Եվրոպա գազատարով։ Սակայն 2022 թվականի ապրիլին Լեհաստանը հրաժարվեց ռուսական գազի դիմաց վճարել ռուբլով, իսկ հաջորդ օրը «Գազպրոմը» դադարեցրեց մատակարարումները։ Մայիսին Լեհաստանը ժամանակից շուտ խզեց Ռուսաստանից գազի մատակարարման մասին պայմանագիրը, որը գործում էր 1993 թվականից։
Baltic Pipe նախագծի իրականացումը տեւել է ավելի քան 20 տարի։
Աղբյուրը՝ Meduza.io
Թարգմանեց՝ Աստղ Խաչատրյանը
