Ես իրականացնում եմ արդարադատության նախարարի տեղակալի պաշտոնավարումը, արդարադատության նախարարի պաշտոնը ստանձնելու առաջարկ և քննարկում չի եղել։
Այս մասին այսօր Ազգային Ժողովում լրագրողների հետ ճեպազրույցի ընթացքում ասաց արդարադատության փոխնախարար Գրիգոր Մինասյանը՝ անդրադառնալով հարցին՝ արդյոք առաջարկ ստացե՞լ նոր պաշտոնում առաջադրվելու համար։
Հարցին՝ եթե, այնուամենայնիվ, առաջարկ լինի, փոխնախարարը կընդունի՞, թե՞ ոչ, Մինասյանը պատասխանեց․ «Եթեներով չեմ պատրաստվում հարցերին պատասխանել, այլ մեկնաբանություն այս հարցի շուրջ չեմ ցանկանում ավելացնել»։
Մինասյանը նաև անդրադարձավ արդարադատության նախարար Կարեն Անդրեասյանին Բարձրագույն դատական խորհրդի նախագահ նշանակելու հարցին։ Ըստ նրա՝ դեռ ԱԺ-ն պետք է քվեարկի, որից էլ պարզ կլինեն արդյունքները։
«Պաշտոնապես հայտարարված է, որ «Քաղաքացիական պայմանագիր»-ը ԲԴԽ-ի անդամ լինելու համար առաջադրել է պարոն Անդրեասյանին ու տիկին Թումանյանցին։ Հետո ԱԺ-ն կքվեարկի, և արդյունքները կտեսնենք»,- ասաց Մինասյանը։
Հարցին՝ արդարադատության նախարարությունը հետևողակա՞ն է օրերս Եռաբլուրում ոստիկանության կողմից իշխանության մուտքը արգելել փորձող զոհված զինծառայողների ծնողների հանդեպ ցուցաբերած վերաբերմունքի հետ կապված հարցի վերաբերյալ, ի՞նչ քայլեր է ձեռնարկում գերատեսչությունը, Մինասյանը պատասխանեց․ «Արդարադատության նախարարությունը հետևողական է այս հարցի շուրջ։ Ես շատ ցավում եմ տեղի ունեցածի համար, խոնարհվում եմ զոհվածների ծնողների առջև: Իսկ ինչ կապված է ոստիկանությունում տեղի ունեցող ներքին քննության հետ, դեռևս տեղեկություններ չկան, արդյունքները կլինեն և կքննարկենք»։
