Մեկնարկել է ՀՀ կառավարության նիստը։ Վարչապետ Նիկոլ Փաշինյանը իր խոսքում անդրադարձավ երեկ հայ-ադրբեջանական սահմանին տեղի ունեցած դեպքին։
Ըստ նրա՝ Ադրբեջանի զինված ուժերը հերթական սադրանքն են իրականցրել ինժեներական աշխատանքներ իրականցնող մեր ստորաբաժանումների ուղղությամբ և հարվածներ են հասցրել։ Ընդ որում՝ ինժեներական աշխատանքները իրականացվել են Հայաստանի տարածքում և հարված հասցրած ադրբեջանական զորքերը նույնպես գտնվում են Հայաստանի տարածքում։
«Սա ադրբեջանական ագրեսիայի հերթական դրսևորումն է։ Հայաստանի տարածքը օկուպացված է։ Մեր դիրքորոշումը աներկբա է՝ Ադրբեջանի զինված ուժերը պետք է հետ քաշվեն Հայաստանի Հանրապետության տարածքից։ Ուզում են մի նրբության մասին ընդգծել՝ մենք Զինված ուժերի լայնածավալ բարեփոխումների գործընթաց ենք սկսել և Ադրբեջանը նման սադրանքներով փորձում է այնպես անել, որ Հայաստանի Հանարապետությունը հնարավորություն չունենա իրականացնել այդ բարեփոխումները։
Նաև տեղյակ եք, որ բոլոր այն ուղղություններով ու դեպքերով նրանք որոշակի հաջողություններ ունեն նաև մեր դաշնակիցների հետ հարաբերությունների իմաստով, և նրանք փորձում են այնպես անել, որ Հայաստանին զենք չմատակարարվի։ Մենք դեպքեր ունենք, երբ որ միլիոնավոր դոլարներ վճարված են, բայց զենքի մատակարարումը չի իրականացվում, այդ թվում դաշնակից երկրների կողմից։
Սա ցավալի իրողություն է, և խորապես պետք է վերլուծենք այս իրավիճակը։ Մենք պետք է արձանագարենք ևս մի բան․ այս ամենը տեղի է ունենում մի հեռահար նպատակով, որ մենք հրաժարվենք մեր ինքնիշխանությունից, մեր պետականությունից, մեր տարածքային ամբողջականությունից զիջումներ անենք, բայց ուզւոմ եմ ընդգծել, որ մենք վճռական ենք, մեր անկախությունը ու տարածքային ամբողջականությունը պաշտպանելու հարցում»,- իր խոսքում ասաց վարչապետը։
Նիկոլ Փաշինյանը նաև իր խոնարհումը հայտնեց Հայոց բանակին․ «Փառք բոլոր այն հերոսներին, ովքեր կանգնած են ՀՀ անկախության, ինքնիշխանության և տարածքային ամբողջականության հիմքում»։
