ՀՀ հատուկ հանձնարարություններով դեսպան Էդմոն Մարուքյանը ուղիղ եթերով անդրադարձել է հայ-ադրբեջանական սահմանային լարվածությանը՝ նշելով՝ ի՞նչ կարող է անել սփյուռքը ստեղծված իրավիճակում:
«Դուք բոլորդ գիտեք, որ Ադրբեջանը շարունակում է իր ագրեսիվ քաղաքականությունը: ՀՀ ինքնիշխան տարածքի նկատմամբ ցուցաբերվել է ագրեսիա նաեւ մեկ տարի առաջ՝ 2021 թվականի մայիսի 12-ին: ՀՀ ինքնիշխան տարածքից մի ամբողջ հատված օկուպացված է: Այս ընթացքում ադրբեջանական զինված ուժերը ոչ միայն դուրս չեն եկել ՀՀ ինքնիշխան տարածքից, այլեւ գումարվել են վերջին դեպքերը, եւ ՀՀ տարածքից նոր տարածքներ են օկուպացվել»,- ասել է Մարուքյանն ու հավելել՝ սա ռազմական ագրեսիա է, հանցագործության վառ դրսեւորում:
Վերջինս շեշտել է՝ Ադրբեջանն իր հանցագործ պահվածքը չի փոխում, եւ սա տեսնելով՝ սփյուռքի մեր հայրենակիցները պարբերաբար իրեն են դիմում, թե ի՞նչ կարող են անել ստեղծված իրավիճակում, որպեսզի օգտակար լինեն Հայաստանին:
«Մենք մի մտահղացում ունենք, որը եթե սփյուռքը կազմակերպված անի, կարող ենք լուրջ արդյունքների հասնել: Քաղաքական մակարդակում Հայաստանի դիվանագետներն իրենց կողմից ունեն համապատասխան ինստրուկցիաներ եւ աշխատանք են տանում, որ յուրաքանչյուր երկրի գործադիր մարմին, նախ, դատապարտի Ադրբեջանի ռազմական ագրեսիան, երկրորդ՝ պահանջի, որ այդ երկրի զինված ուժերը դուրս բերվեն ՀՀ սուվերեն տարածքից եւ երրորդ՝ աշխատանքներ տարվեն այն ուղղությամբ, որ Ադրբեջանի համար այս ամենն անհետեւանք չմնա՝ սանկցիաներ կիրառվեն»,- շեշտել է նա:
Մարուքյանը նաեւ հայտնել է, որ իրենց կուսակցության ներկայացուցիչները պատրաստել են 136 ընկերության ցանկ, որոնք գործունեություն են ծավալում Ադրբեջանում. «Այդ ընկերությունների նկատմամբ պետք է սկսվեն համապատասխան գործողություններ: Խելացի, թիրախային ակցիաներ են արվելու: Դրանց գլխամասային գրասենյակների մի մասը Ֆրանսիայում է, մի մասը՝ Կալիֆորնիայում, Նյու Յորքում եւ Արեւմուտքի այլ քաղաքներում ու երկրներում: Մենք պետք է կազմակերպված ձեւով ցույց տանք, որ ամոթ է մի երկրում բիզնես անել, հարստացնել դրա տնտեսությունը, որն այդ գումարները ծախսում է անմեղ մարդկանց սպանելու, հարեւան երկրի տարածքներն օկուպացնելու վրա»:
Վերջինիս համոզմամբ՝ այդ կազմակերպված արշավից հետո բավարար է անգամ այն, որ Ադրբեջանի նախագահը զգա՝ արեւմտյան երկրներում քննարկվում է իրենց նկատմամբ սանկցիաների կիրառման հարցը, դրանից հետո, ըստ Մարուքյանի, ադրբեջանական զորքերը շատ արագ դուրս կբերվեն ՀՀ ինքնիշխան տարածքից եւ կգնան ելման դիրքեր: Այսինքն՝ այն դիրքեր, որտեղ դրանք տեղակայվել էին դեռեւս նոյեմբերի 9-ից հետո:
«Մենք ունենք հնարավորություն մեր դիվանագիտական ու սփյուռքի ողջ ներուժն օգտագործելով՝ հասնել նրան, որ խաղաղ ճանապարհով, առանց նոր զոհերի՝ Ադրբեջանի զինված ուժերը դուրս գան ՀՀ սուվերեն տարածքից»,- ասել է նա:
Մանրամասները՝ տեսանյութում:
