Ադրբեջանում գերեվարված անձանց թվի հետ կապված վիճակագրական տվյալներ մենք չենք կիսում հանրության հետ, բայց մենք անմիջական կապի մեջ ենք համապատասխան անձանց ընտանիքների հետ։
Այս մասին այսօր հրավիրված մամուլի ասուլիսի ընթացքում ասաց Կարմիր Խաչի միջազգային կոմիտեի հայաստանյան գրասենյակի հաղորդակցման և կանխարգելման ծրագրերի ղեկավար Զառա Ամատունին:
Նրա խոսքով՝ ԿԽՄԿ–ի ներկայացուցիչները հայ գերիներին, որոնց Ադրբեջանի իշխանությունները հաստատել են կազմակերպությանը, տեսակցել են սեպտեմբերի 23-ին:
«Ինչպես այլ դեպքերում, այս դեպքում և հնարավորություն է եղել շրջել այդ պահման վայրերով, այդ անձանց առողջական վիճակը ստուգել, իրենց ընտանիքների հետ կապ հաստատել, և բնականաբար, այս գործընթացը շարունակական է»,-ասաց նա։
Անդրադառնալով համացանցում երեկվանից տարածված տեսանյութին, որտեղ է ադրբեջանական ԶՈՒ-ի զինծառայողները գնդակահարում են գերեվարված հայ զինծառայողներին՝ Ամատունին հավելեց՝ «Նման տեսանյութերը և ցանկացած նյութեր, որոնք հայտնվում են համացանցում, անմիջապես տեսնում ենք, կողմերի հետ ունենում ենք քննարկում, հետադարձ կապ։ Հանրային հարթակում այս պահին մենք ոչինչ չենք կարող հայտարարել, քանի որ լինելով չեզոք մարդասիրական կազմակերպություն, իրավասություն չունենք անել որևէ հայտարարությւոն այս կապակցությամբ»,– հավելեց Կարմիր Խաչի միջազգային կոմիտեի հայաստանյան գրասենյակի հաղորդակցման եւ կանխարգելման ծրագրերի ղեկավար Զառա Ամատունին։
