ՀՀ անվտանգության խորհրդի քարտուղար Արմեն Գրիգորյանը ԱՄՆ-ում «Ֆոքս Նյուզ» լրատվական հեռուստաընկերությանը տված հարցազրույցում անդրադարձել է ադբեջանաակն ռազմական ագրեսիային։
Գրիգորյանն ասել է, որ միջազգային հանրությունը պետք է դատապարտի Ադրբեջանի կողմից ուժի կիրառումը և կոչ անի դուրս բերել ադրբեջանական զորքերը ՀՀ ինքնիշխան տարածքից: Այդ առումով նա բարձր է գնահատել ԱՄՆ-ի կողմից ավելի հասցեական գնահատականները. «Միջազգային հանրությունը պետք է քայլեր ձեռնարկի՝ ինչպես Միացյալ Նահանգներն է անում: Միացյալ Նահանգները շատ հստակ էր իր ձևակերպումներում. նա կոչ արեց Ադրբեջանին դուրս բերել իր զորքերը Հայաստանի ինքնիշխան տարածքից, և մենք կարծում ենք, որ միջազգային հանրությունը պետք է դատապարտի ուժի կիրառումը, որն արվել է Ադրբեջանի կողմից, և միջազգային հանրությունը պետք է աջակցի դիվանագիտական գործընթացին»։
Նա խոսել է ՌԴ կողմից Ադրբեջանին զենքի վաճառքի թեմային՝ նշելով. «Դա հրապարակային տեղեկություն է: Այո՛, դա ճիշտ է: Եվ դա շատ է անհանգստացնում մեզ: Դա նոր բան չէ»։
