Տավուշի մարզի Բերդ քաղաքում գտնվող «Վիլհելմ Մաթևոսյան» արվեստի ստուդիան ասես աշխարհից կտրված դրախտային անկյուն լինի, որտեղ ժամանակը չափվում է գույներով, որոնք անընդհատ ավելանում են ու չեն վերջանում։
Անվանի արվեստաբան Վիլհելմ Մաթևոսյանի մահվանից հետո իր անունը կրող փողոցում գտնվող հայրական տանը նրա քույրը՝ Էլմիրա Մաթևոսյանն իր ամուսնու՝ նկարիչ Լեսինգ Աղաքարյանի հետ միասին հավաքել են նրա հետ կապված իրերն ու արվեստի գործերը, և տունը վերածել իսկական արվեստանոցի, որտեղ լիովին անվճար կրթվում են համայնքի փոքրիկները, ովքեր նկարիչ դառնալու երազանք ունեն։
