Ս/թ հոկտեմբերի 4-ին Հայկական ԱԷԿ է այցելել Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսսիի գլխավորած պատվիրակությունը: Այս մասին տեղեկացնում են Հայկական ատոմային էլեկտրակայանից:
ԱԷՄԳ-ի պատվիրակությանն ուղեկցել են ՀՀ ՏԿԵ նախարարի տեղակալ Հակոբ Վարդանյանը, Ավստրիայում ՀՀ դեսպան Արմեն Պապիկյանը և ՀՀ ԱԳՆ ներկայացուցիչներ:
Հյուրերը նախ շրջայց են կատարել կայանի տարածքում, ծանոթացել ՀԱԷԿ-ում իրականացված արդիականացման աշխատանքներին, տեղում ստացել իրենց հետաքրքրող հարցերի պատասխաններն ու անհրաժեշտ տեղեկատվությունը:
Տեխնիկական շրջայցից հետո ՀԱԷԿ-ի ղեկավարության հետ կայացած խորհրդակցության ընթացքում հյուրերին նախ ողջունել է ՀՀ ՏԿԵ նախարարի տեղակալ Հ. Վարդանյանը: Նա կարևորել է այն փաստը, որ ստեղծված իրավիճակում Ռ. Գրոսսին պատրաստակամություն է ցուցաբերել այցելել Հայաստան և Հայկական ԱԷԿ: Փոխնախարարն ընդգծել է, որ ՀԱԷԿ-ի թիվ 2 էներգաբլոկի վերաթողարկման պահից սկսած՝ արդեն շուրջ 30 տարի, ԱԷՄԳ-ն տեխնիկական աջակցություն է տրամադրում Հայկական ատոմակայանին, որի դերն անհամեմատ մեծ է մեր տնտեսության զարգացման գործում:
Այնուհետև ողջույնի խոսքով հանդես է եկել ԱԷՄԳ տնօրեն Ռաֆայել Գրոսին: Նա մեծ գոհունակությամբ է նշել, որ իր նախորդ այցից ի վեր կայանում բազմակողմանի լայնամասշտաբ աշխատանքներ են իրականացվել, ինչը, անշուշտ, կերաշխավորի կայանի հետագա անվտանգ և հուսալի շահագործումը:
«Ես այսօր հնարավորություն ունեցա սեփական աչքերով տեսնելու այն հսկայածավալ աշխատանքը, որն իրականացվել է Մեծամորի ԱԷԿ-ում, և համոզվեցի, որ դուք իրապես արժանի եք այն աջակցությանը, որը տրամադրվում է ԱԷՄԳ-ի կողմից: Շարունակե՛ք աշխատել նույն ոգով, իսկ մենք մեր հերթին կանենք հնարավոր ամեն ինչ ձեզ աջակցելու համար»,- եզրափակել է իր խոսքը գործակալության ղեկավարը:
«ՀԱԷԿ» ՓԲԸ գլխավոր տնօրեն Է. Մարտիրոսյանն իր հերթին ողջունել է հյուրերին և շնորհակալություն հայտնել երկարամյա սերտ և արդյունավետ փոխգործակցության համար: Է. Մարտիրոսյանը ներկայացրել է ընթացիկ և հեռանկարային ծրագրերը. այս պահին նախապատրաստական աշխատանքներ են տարվում ինչպես թիվ 2 էներգաբլոկի շահագործման ժամկետի կրկնակի երկարացման, այնպես էլ նոր էներգաբլոկի կառուցման նախագծերի ուղղությամբ:
«Մենք ունենք մեծ ռեսուրս և մեծ ցանկություն»,- նշել է «ՀԱԷԿ» ՓԲԸ գլխավոր տնօրենը,- և հույս ունենք, որ դա մեզ կօգնի հաջողության հասնել»: Նա նաև ընդգծել է ատոմային կայանի շահագործման աշխատանքներում երիտասարդ սերնդի ներգրավման կարևորությունը, ինչը մշտապես եղել և մնում է ՀԱԷԿ-ի ղեկավարության ուշադրության կենտրոնում:
Հանդիպման ավարտին կողմերը փոխադարձ վստահություն են հայտնել, որ ՀԱԷԿ-ԱԷՄԳ երկարամյա համագործակցությունն ունի ընդլայնվելու և մշտապես զարգանալու բոլոր նախադրյալները:
