Կառավարությունը մի շարք ծրագրեր ունի՝ աջակցելու Ադրբեջանի ագրեսիայից տուժած համայնքներին, մարզերին, այս դեպքում՝ Վայոց Ձորի, Գեղարքունիքի և Սյունիքի մարզերին: Այս մասին այսօր Ազգային ժողովում կառավարության հետ հարցուպատասխանի ժամանակ ասաց փոխվարչապետ Համբարձում Մաթևոսյանը՝ պատասխանելով «Քաղաքացիական պայմանագիր» խմբակցության պատգամավոր Արմեն Խաչատրյանի հարցին, թե ինչպիսի միջոցառումներ են իրականացվում Հայաստանի սուվերեն տարածքի վրա գույքի հափշտակություններով ու թալանով ուղեկցվող հարձակումների հետևանքով քաղաքացիների գույքային վնասները փոխհատուցելու ուղղությամբ:
«Մենք կառավարության նախորդ նիստերում օրակարգային հարցերում նաև քննարկեցինք և մարզպետարանին հատկացրեցինք գումար՝ սոցիալական խնդիրներ լուծելու համար: Բացի սրանից, ունենք Քաղաքաշինության կոմիտեով ընթացիկ այլ աշխատանքներ, աշխատանքները պետք է իրականացվեն այն համայնքներում, որտեղ տուժել են քաղաքացիների սեփականությունը և իհարկե պետական գույքը»,– ասաց փոխվարչապետը։
Նա նշեց, որ խոսքը վերաբերում է դպրոցներին ու մանկապարտեզներին։
«Այս դեպքում մենք միանշանակ կաջակցենք, եթե պարզվի, որ քաղաքացիները տուժել են ագրեսիայի հետևանքով»,- նշեց Համբարձում Մաթևոսյանը:
