Արդեն շատ վաղուց կաշառքը չէ դատական համակարգի ամենամեծ խոցը, ինչի մասին ես խոսում էի 2013-ին: Այս մասին այսօր Ազգային ժողովում ԲԴԽ անդամի ընտրության քննարկմանը ասաց արդարադատության արդեն նախկին նախարար Կարեն Անդրեասյանը:
«Մեծ լավ բան է տեղի ունեցել, չեմ ասում կաշառքը վերացել է, ասում եմ դա համատարած չէ, այլևս դատական համակարգը չի հիշեցնում սուպերմարկետ, և շատ երկար ժամանակ է դա դադարել է»,- ասաց նա:
Կարեն Անդրեասյանը նշեց, որ դատական համակարգը շատ զտվել, մաքրվել է: «Կարելի է ասել 80 տոկոսով մաքրվել է դատական համակարգը»,- ասաց նա:
Անդրադառնալով 2013 թվականի զեկույցին, երբ ինքը դեռ Մարդու իրավունքների պաշտպան էր, Կարեն Անդրեասյանն ասաց. «Կան մարդիկ, որ այն զեկույցից սարսափած, հիմա էլ կարծելով, թե հիշաչարության, վենդետաների ինչ-որ մտքերով եմ առաջնորդվում, իրենց թվում է, որ եթե ես հանկարծ հայտնվեմ ԲԴԽ-ում, լինելու եմ իրենց պես կամ իրենց որոշ ընկերների պես: Ես բոլորին երաշխավորում եմ, որ բացի իրենց օգնելուց, ընկերաբար օգնելուց, որ եկեք միասին գտնենք ձեր կողքը նստած վատերին, վարկաբեկողներին և հրաժեշտ տանք, այլ երազանք, նպատակ չկա»,- ասաց նա:
