Վնասված տների հետ կապված արդեն գումարների փոխանցում ենք իրականացնում բնակիչներին, որպեսզի իրենք վերականգնում անեն: Այս մասին այսօր լրատվամիջոցների հետ զրույցում ասաց Գեղարքունիքի մարզպետ Կարեն Սարգսյանը, անդրադառնալով սեպտեմբերի 13-ին Ադրբեջանի կողմից սանձազերծված պատերազմի հետևանքով Սոթքում վնասված տների վերականգնմանը:
Տներից մի քանիսը վերականգնման ենթակա չեն.
«Այն 8 տները, որոնք ամբողջությամբ վնասված են և վերակառուցման կարիք կա՝ Քաղաքաշինության կոմիտեն է զբաղվում դրանցով: Առաջիկայում պարզ կդառնա, թե ինչ տիպի տներ են կառուցվելու»,- նշեց մարզպետը։
Հարցին, թե արդյոք տարհանված բնակիչները վերադարձել են իրենց տներ, Գեղարքունիքի մարզպետն ասաց, որ գրեթե 80 տոկոսով հետ են վերադարձել.
«Հիմնականում, տեղում չեն այն բնակիչները, որոնց տները խոշոր չափով վնասվածքներ են կրել և չեն կարողանում այդ տներում ապրել»,- ասաց նա:
Ինչ վերաբերում է նրան, թե արդյոք պետությունը վերջիններիս ժամանակավոր կացարաններով ապահովել է, Կարեն Սարգսյանը նշեց, որ հայտարարել են, որ մարզպետարանն ունի միջոցներ։
«Մարզի տարածքում վարձած տների հետ կապված ևս փոխհատուցում կտանք»,- ընդգծեց նա:
Ինչ վերաբերում է Սոթքի հանքի աշխատանքին, Կարեն Սարգսյանի խոսքով՝ այն գործում է այս պահին:
Սահմանային իրավիճակին անդրադառնալով, մարզպետը նշեց, որ բացի ՊՆ-ի տված տվյալներից, այլ բան ասել չի կարող: Իսկ երեկ սահմանին տիրող լարված իրավիճակը Գեղարքունիքի մարզում չի նկատվել:
Հարցին, թե տեղեկություններ կան, որ Վերին Շորժայի բլրակում, որտեղ դիեր կան, հայկական կողմը չի կարողանում հանել՝ հակառակորդը կրակում է՝ Գեղարքունիքի մարզպետն ասաց, որ նման տեղեկությունների չի տիրապետում:
