Մարդու իրավունքների պաշտպանի գրասենյակի աշխատակիցները հոկտեմբերի 6-ին առանձին հանդիպումներ ու զրույցներ են ունեցել ՀՀ վերադարձած 17 գերիներից 16-ի հետ: Այս մասին լրագրողների հետ հանդիպման ժամանակ տեղեկացրեց ՀՀ մարդու իրավունքների պաշտպան Քրիստիննե Գրիգորյանը։
«Որեւէ տղայի ավելորդ չթիրախավորելով ու ճնշման չենթարկելով, պետք է արձանագրել, որ բոլորն էլ խոշտանգվել են, վատ վերաբերմունքի ու նվաստացումների արժանացել»,-հայտնեց ՄԻՊ-ը: Վերջինիս փոխանցմամբ՝ հայ զինծառայողներն անգամ բժիշկների կողմից են վատ վերաբերմունքի արժանացել։
Ըստ ՄԻՊ-ի՝ խոշտանգումների մասին հայտնել են գրեթե բոլոր գերիները։ «Մեկ տղա կա, որն այս պահին հոսպիտալում է գտնվում, նրա հետ այսօր առանձնազրույց կունենանք։ Մենք առանձին զեկույց կներկայացնենք, որտեղ կարձանագրենք այն փաստական տվյալները, որոնք հայտնել են տղաները»,-ասաց Գրիգորյանը:
Նրա փոխանցմամբ` 2020 թվականի 44-օրյա պատերազմից հետո հայրենիք վերադարձած գերիների հետ նույնպես առանձնազրույց էին ունեցել եւ առանձին զեկույց են հրապարակել։ «Ադրբեջանական կողմի ձեռագիրը որեւէ կերպ չի փոխվել։ Մարդու իրավունքների պաշտպանի գրասենյակը զեկույց կներկայացնի միջազգային կառույցներին»,-նշեց Գրիգորյանը։
