Ադրբեջանցի զինծառայողների կողմից Հայաստանի սահմանամերձ բնակավայրերի խաղաղ բնակչությանն ահաբեկման ու վնասման գործողությունները, էթնիկ ատելության շարժառիթով պայմանավորված ու հրամանատարության կողմից համակարգված գործողությունները, փաստացի միտված են եղել սեպտեմբերյան ագրեսիայի համար հող նախապատրաստելուն, քանի որ հիմնականում թիրախավորվել են սեպտեմբերին հարձակման ենթարկված համայնքները:
Այս մասին այսօր ասուլիսի ընթացքում հայտարարեց ՀՀ մարդու իրավունքների պաշտպան Քրիստիննե Գրիգորյանը՝ հավելելով՝ վերոնշյալը ՄԻՊ-ի փաստահավաք առաքելության կողմից հիմնավորվել է:
Նրա փոխանցմամբ՝ հուլիս-օգոստոս ամիսներին Տավուշի եւ Գեղարքունիքի մարզերում փաստահավաք առաքելություններ իրականացնելու ժամանակ արձանագրվել են հոգեբանական ճնշման ու վնասարարության կոնկրետ օրինակներ, որոնց մասին եւս առանձին զեկույց է հրապարակվելու:
«Գիշերվա ժամերին իրենց դիրքերից ուժեղ լույսեր են գցում բնակելի տների պատուհաններից ներս: Շատ համայնքներում ենք արձանագրել, երբ իրենց բարձրադիր դիրքերից անիվներ են այրում եւ բաց թողնում դեպի գյուղեր՝ շատ դեպքերում թիրախավորելով եւ այրելով հավաքած խոտը, իսկ նման տարածքներում մարդկանց միակ ապրուստը հենց անասնապահությունն է: Գողանում են մարդկանց ընտանի կենդանիներին կամ բարձրախոսներով հնչեցնում են սպառնալիքներ իրենց դաշտերում աշխատող հայ խաղաղ բնակիչների նկատմամբ: Սրանք չէին կարող լինել պատահականություններ, դա ձեռագիր է եւ հրամանատարական մի կետից կառավարվող կոնկրետ գործողությունների շարք»,- նշեց Քրիստիննե Գրիգորյանը:
Ըստ ՄԻՊ-ի՝ այդ ամենն ուղղակի շարունակական հոգեբանական ահաբեկման օրինակ է: Սրանք կրկնվող դեպքեր են, որոնք հիմք են տալիս պնդելու, որ ադրբեջանական կողմի քաղաքականության նպատակն այդ գյուղերի հայաթափումն է:
«Ուզում են հանսել նրան, որ մարդիկ վախից ստիպված դուրս գան իրենց համայնքներից: Իսկ սեպտեմբերյան հարձակումը ցույց տվեց, որ նման վարքագիծը հող էր նախապատրաստում Հայաստանի սահմանի գրեթե ամբողջ երկայնքով ագրեսիվ պատերազմ սկսելու համար: Ունենք կոնկրետ ապացույցներ, որ դրանք հստակ կառավարվող գործողություններ են եւ կոնկրետ մեկ-երկու դիրքի զինծառայողի քմահաճությունները չեն»,-եզրափակեց Քրիստինե Գրիգորյանը։
