Ստեփանակերտի Վերածննդի հրապարակում սկսվել է ինքնաբուխ հավաքը: NEWS.am-ի հետ զրույցում ակցիայի մասնակից Մարատ Ստեփանյանն ասաց, որ քաղաքացիների պահանջը չի փոխվել, նրանք պահանջում են, որ Արայիկ Հարությունյանը հստակ դիրքորոշում հայտնի Պրահայի քառակողմ հանդիպման հայտարարության եւ Ադրբեջանի նախագահ Իլհամ Ալիեւի հայտարարությունների վերաբերյալ:
«Մի քանի հարյուր քաղաքացի է հավաքվել, մեկը մյուսին ասելով հավաքվում են, մեծ թվով ոստիկաններ կան հավաքված արդեն»,-ասաց նա:
Մարատ Ստեփանյանը նշեց, որ տեղյակ է` նախագահ Հարությունյանի պատվիրակությամբ Հայաստան գալու մասին, սակայն այդ այցի հետ առնձնապես հույսեր չեն կապում:
«Մենք գիտենք, որ դա զուտ աչքակապություն է, այնպես չէ, որ այդ հանդիպումից հետո մի բան կփոխվի, հեսա դուրս կգան, ստից մի բան կհայտարարեն, այնքան որ մարդիկ այդ օրը կշտանան այդ ինֆորմացիայով»,-ասաց նա:
Աղբյուրը` News.am:
