Աշտարակ-Գյումրի ավտոճանապարհին բեռնատարի ու մարդատարի բախման հետևանքով կան զոհեր և տուժածներ

Հոկտեմբերի 9-ին՝ ժամը 20:29-ին, Արագածոտնի մարզային ճգնաժամային կառավարման կենտրոն ահազանգ է ստացվել, որ Ուջան-Շամիրամ ավտոճանապարհին տեղի է ունեցել ՃՏՊ, կան տուժածներ, անհրաժեշտ է փրկարարների օգնությունը։

Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։

Պարզվել է, որ Աշտարակ-Գյումրի ավտոճանապարհի 17-րդ կմ-ին բախվել են «ԶԻԼ» մակնիշի (վարորդ՝ Գ․ Գ․, ծնված 1957 թ․) բեռնատարը և «Պորշ» մակնիշի (վարորդ՝ Վ․ Ու․, ծնված 1987 թ․) ավտոմեքենան: Վարորդները տեղում մահացել են։

Մինչ հրշեջ-փրկարարների կանչի վայր հասնելը «Պորշ» մակնիշի ավտոմեքենայի ուղևորներ Մ․ Ս․-ն (ծնված 1992 թ․) և Ս․ Բ․-ն (ծնված 1973 թ.) հոսպիտալացվել են Աշտարակ քաղաքի ԲԿ, որտեղ բժիշկները Մ․ Ս․-ի առողջական վիճակը գնահատել են բավարար, իսկ Ս․ Բ․-ն տեղափոխվել է Երևան «Էրեբունի» ԲԿ։

Փրկարարները հոսանքազրկել են ավտոմեքենաները, փակել գազի բալոնների փականները, սահմանազատել տարածքը, իրականացրել ճանապարհի լվացման աշխատանքներ և «ԶԻԼ» մակնիշի բեռնատարի վարորդի դին մոտեցրել շտապօգնության ավտոմեքենային։