ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանն այսօր խորհրդարանական ճեպազրույցների ընթացքում անդրադառնալով ԵՄ դիտորդական առաքելությանը նշեց՝ այդ առաքելությունն իր կարծիքով կնպաստի կայունացմանը և լրացուցիչ ևս մեկ զսպող գործոն կլինի ադրբեջանական հնարավոր ագրեսիայի համար:
Հարցին՝ թե երբ է տեղակայվելու դիտորդական առաքելությունը, Ալեքսանյանը հայտնեց, որ հստակ ժամկետ չկա:
Անդրադառնալով «միջանցքի» հարցին էլ, խմբակցության այլ պատգամավոր Հռիփսիմե Գրիգորյանը նշեց, որ որևէ պաշտոնական բանակցությունում Հայաստանի ինքնիշխան տարածքով որևէ «միջանցքի» մասին խոսակցություն չկա և չի էլ կարող լինել. «Որևէ պաշտոնական ձևաչափում, որևէ տեղ ընդհանրապես «միջանցք» բառը, բացի Լաչինից, այլ համատեքստում չի կարող օգտագործվել: Հայաստանի տարածքային ամբողջականությունը սակարկման, բանակցման ենթակա չէ:
Եվ ինչքան էլ սրա մասին խոսի Ալիևը կամ որևէ այլ պաշտոնյա, մենք պետք է հասկանանք, որ դրանք կարող են լինել ցանկություններ, նկրտումներ, բայց երբեք չեն կարող տեղ գտնել պաշտոնական բանակցային գործընթացում: Պաշտոնապես ևս մեկ անգամ հայտարարում եմ՝ չկա մեր ինքնիշխան տարածքից որևէ միջանցքի մասին խոսակցություն որևէ պաշտոնական բանակցությունում, և սրա մասին փաստում են բոլոր հայտարարությունները, որոնք հրապարակվել են տարբեր ձևաչափերով»։
