Սեպտեմբերի 13-ից հետո անհետ կորած համարվող զինծառայողների հարազատները այսօր բողոքի ակցիա էին իրականացրել ՀՀ պաշտպանության նախարարության դիմաց:
Հարազատներից մեկն ասել է, որ վերջին անգամ զինվորից զանգ են ստացել սեպտեմբերի 15-ին, դրանից հետո ոչ մի լուր չունեն:
Նրանցից մեկի հայրն էլ նշել է՝ ուղղությունով գիտի, թե որտեղ է իր տղան, սակայն որոնողական աշխատանքներ չեն իրականացվում, քանի որ տարածքը գտնվում է ադրբեջանական վերահսկողության տակ։
Պաշտպանական գերատեսչության դիմաց հավաքված ծնողները նշել են, որ երկու օր ևս կսպասեն, եթե հարցը լուծում չստացավ, կդիմեն այլ քայլերի:
Հիշեցնենք՝ սեպտեմբերի 12-ի լույս 13-ի գիշերը խոշոր տրամաչափի զինատեսակների, հրետանու, հրթիռային համակարգերի, անօդաչու թռչող սարքերի կիրառմամբ Ադրբեջանի զինված ուժերը լայնածավալ ագրեսիա էին սկսել Հայաստանի Հանրապետության ինքնիշխան տարածքի նկատմամբ: Ըստ պաշտոնական տվյալների՝ ագրեսիայի հետևանքով զոհվածների և անհետ կորածների թիվը 207-ի սահմանում է:
