Հայաստանի տարածքային ամբողջականությունը պետք է հարգվի, եւ Ադրբեջանը պետք է իր զորքերը դուրս բերի հայկական տարածքից՝ համաձայն 2020 թվականի նոյեմբերյան պայմանագրի։ Այս մասին, ելույթ ունենալով ԵԽԽՎ-ում աշնանային նստաշրջանի քննարկումներում, ասել է ֆրանսիացի պատվիրակ Ժակ Լը Նեյը:
՛՛Այս բախումներն ամենախոշորն են 2020 թվականի պատերազմի ավարտից հետո։ Մենք պետք է հիշեցնենք մի շարք հիմնարար սկզբունքների մասին։ Նախ՝ անհրաժեշտ է հարգել Հայաստանի տարածքային ամբողջականությունը, իսկ 2020 թվականի նոյեմբերի 10-ի հրադադարի համաձայնագրով Ադրբեջանը պետք է զորքերը դուրս բերի հայկական տարածքից՛՛,-նշել է նա:
Ժակ Լը Նեյը նաեւ կոչ է արել հետաքննել եւ պատասխանատվության ենթարկել բոլոր մեղավորներին՝ կապված տեսանյութի հետ, որտեղ ադրբեջանցի զինվորները խոշտանգում եւ սպանում են հայ զինծառայողներին։
՛՛Կողմերին կոչ եմ անում հնարավորինս շուտ կնքել խաղաղության համաձայնագիր, Եվրախորհուրդը պետք է ամբողջությամբ խաղա քննարկումների համաեվրոպական հարթակի դերը եւ խթանի քաղաքական երկխոսությունը։
Միջազգային հանրությունը չի կարող անտարբեր մնալ տարածաշրջանում տիրող իրավիճակի նկատմամբ։ Եվրամիությունը, Միացյալ Նահանգները, ինչպես նաեւ Ռուսաստանը եւ Թուրքիան պետք է միասին աշխատեն այս հակամարտությունը կարգավորելու համար՛՛,-հավելել է նա եւ նշել, որ Ուկրաինայի պատերազմի պատճառով Ռուսաստանն ավելի քան երբեւէ մեկուսացված է եւ չի պատրաստվում նպաստել քննարկումներին։
՛՛Նա ինքնին ճահճացած է Ուկրաինայում, եւ, հետեւաբար, մենք պետք է բարձրացնենք իրազեկվածությունը՝ ի շահ տարածաշրջանի խաղաղության՛՛,-ասել է պատվիրակը:
