ԱՄՆ պետքարտուղար Էնթոնի Բլինքենն այսօր զրուցել է Ադրբեջանի նախագահ Իլհամ Ալիևի հետ, հաղորդում է ԱՄՆ Պետական դեպարտամենտի մամուլի ծառայությունը։
«Պետքարտուղար Բլինքենը երախտագիտություն է հայտնել այն դրական քայլերի համար, որոնք Ադրբեջանը և Հայաստանը ձեռնարկում են կայուն խաղաղության համաձայնագրի հասնելու ուղղությամբ, ներառյալ վերջերս ԱԳ նախարարների և ղեկավարների միջև ուղիղ բանակցությունները:
Պետքարտուղար Բլինքենը ողջունել է հոկտեմբերի 4-ին Ադրբեջանի կողմից 17 ռազմագերիների ազատ արձակումը Հայաստանին և հորդորել նախագահ Ալիևին շարունակել ժամանակային և չափելի քայլերը՝ աջակցելու խաղաղ գործընթացին։
Պետքարտուղար Բլինքենը կրկնել է ԱՄՆ աջակցությունը, ներառյալ սահմանների հստակ սահմանազատման, տրանսպորտային կապերի, անհայտ կորածների վերականգնման և նույնականացման, կալանավորների վերադարձի և այլ հարցերում:
Նա ընդգծել է Լեռնային Ղարաբաղի բնակիչների իրավունքների և երաշխիքների վերաբերյալ քննարկումների կարևորությունը և երկու կողմերի կողմից հրադադարի ռեժիմը պահպանելու և բանակցային համաձայնագրի վրա կենտրոնանալու անհրաժեշտությունը՝ որպես կայուն խաղաղության միակ ճանապարհ»։
