ՆԱՏՕ-ի անդամներն ու դաշնակիցները Բրյուսելում հանդիպման ժամանակ, հավանաբար, կկենտրոնանան Ուկրաինային հակաօդային պաշտպանության լրացուցիչ համակարգեր տրամադրելու վրա: Այս մասին հայտարարել է ՆԱՏՕ-ում ԱՄՆ մշտական ներկայացուցիչ Ջուլիանա Սմիթը, հայտնում է CNN-ը։
Նրա խոսքով՝ Ուկրաինայի պաշտպանության Կոնտակտային խմբի ավելի քան 50 երկրներ կհանդիպեն հոկտեմբերի 12-13-ը կայանալիք ՆԱՏՕ-ի նախարարական նիստի նախաշեմին, որպեսզի պարզեն, թե էլ ինչ կարելի է անել Ուկրաինային օգնելու համար։
Քննարկումները, հավանաբար, կկենտրոնանան հակաօդային պաշտպանության աջակցության վրա, ասել է նա: «Մեր ուշադրությունն ի սկզբանե կենտրոնացած է եղել արագության վրա»,- ասել է նա՝ հավելելով, որ պատերազմի սկզբից ԱՄՆ-ը կապի մեջ է Ուկրաինայի նախագահ Վլադիմիր Զելենսկու եւ պաշտպանության նախարարի հետ։ «Մենք անընդհատ գնահատում ենք նրանց կարիքները, միավորում ենք այն երկրների հետ, որոնք ունեն ակտիվներ, եւ ուղիներ ենք փնտրում այդ ակտիվները հնարավորինս արագ Ուկրաինայի զինված ուժերին փոխանցելու համար»:
