Կառավարության շենքի դիմաց շարունակվում է Ամուլսարի հանքի շահագործման դեմ բողոքի ակցիան: Ինչպես տեղեկացնում է shantnews-ը, քիչ առաջ բնապահպանները կառավարության ներկայացուցիչներին 5 րոպե ժամանակ տվեցին, որպեսզի վերջիններս թույլ տան, որ 5 բնապահպան մտնի կառավարության շենք և նիստում ներկայացնի հանքի շահագործման մասին փորձագիտական եզրակացությունը:
Ոստիկանները փակել էին կառավարության շենքի մուտքը, բնապահպանների հետ տեղի էր ունեցել վիճաբանություն:
Քիչ առաջ հավաքվածներին է մոտեցել վարչապետի օգնական Նաիրի Սարգսյանը և խնդրել փոխանցել բնապահպանների ներկայացրած դիրքորոշումների փաթեթը: Բայց բնապահպանները ցանկանում են անձամբ հանդիպել վարչապետի հետ:
Բնապահպանները նշում են, որ այդ փաթեթն առանց իրենց խոսքի անհասկանալի կլինի, և պետք է իրենք ներկայացնեն փաթեթի բովանդակությունը:
Ակցիայի մասնակիցները որոշեցին սպասել, մինչ վարչապետի օգնականը կփորձի կազմակերպել վարչապետի հետ հանդիպումը:
