Հայաստանի մտահոգությունը շարունակում է մնալ այն, որ Ադրբեջանը խաղաղության պայմանագրից հետո չդելիմիտացված սահմանի պատրվակը կարող է օգտագործել ՀՀ վրա հարձակվելու համար։ Այս մասին Հանրային հեռուստաընկերության եթերում հայտարարեց ՀՀ անվտանգության խորհրդի քարտուղար Արմեն Գրիգորյանը։
«Վաշինգտոնում ԱՄՆ ազգային անվտանգության հարցերով խորհրդական Ջեյք Սալիվանի և Ադրբեջանի նախագահի օգնական Հիքմեթ Հաջիևի հետ հանդիպմանը քննարկել ենք խաղաղության պայմանագրի ժամանակացույցը։ Պայմանավորվածություն է ձեռք բերվել, որ մինչև տարեվերջ դելիմիտացիա է տեղի ունենալու։ Խաղաղության պայմանագիրը և դելիմիտացիան փոխկապակցված են»,- ասաց ՀՀ ԱԽ քարտուղարը։
Արմեն Գրիգորյանը նշեց նաև, որ Լեռնային Ղարաբաղի հիմնախնդրի մասով հիմնական օրակարգը եղել է, թե ինչպես են միջազգային մեխանիզմներ ստեղծվելու, որպեսզի Լեռնային Ղարաբաղը և Ադրբեջանը քննարկեն ԼՂ-ում ապրող հայերի անվտանգությունն ու իրավունքները:
Գրիգորյանը նաև նշեց, որ Հաջիևի հետ քննարկվել է Ադրբեջանի զորքերի ամբողջությամբ դուրսբերումը ՀՀ սուվերեն տարածքից։
«Հայաստանի և Ադրբեջանի սահմանը դելիմիտացիայի ենթարկվել է 1929 թվականին։ Այստեղ մնում է փոխադարձ համաձայնության գալ, որ սա ընդունում ենք որպես հիմք, որպես Հայաստանի և Ադրբեջանի միջև սահման, ընդունենք այդ սահմանը, ապահովագրենք Հայաստանի 29800 քառ․ կմ տարածքը և առաջ շարժվենք»,- ասաց Գրիգորյանը։
Նա նշեց, որ մեխանիզմների հարցում դեռևս հստակություն չկա, բայց կա ընկալում, որ այս ՀՀ-ն ուղղությամբ պետք է շարժվի։
ԱԽ քարտուղարը նաև ասաց, որ քննարկվել է ապաշրջափակման հարցը։ Կարևոր է, որ ապաշրջափակումը տեղի է ունենալու փոխադարձության սկզբունքի հիման վրա։
«Հայաստանի դիրքորոշումը մնում է նույնը, որ որևէ հարց չենք քննարկելու, որը կունենա միջանցքային տրամաբանություն։ Ապաշրջափակումը պետք է տեղի ունենա սուվերենության հիման վրա»,- նշեց նա։
