Կառավարությունը մտադիր է հրաժարվել եռամսյա հավաքների անցկացումից։ Փոխարենը, ինչպես տեղեկացրեց ՀՀ պաշտպանության նախարար Սուրեն Պապիկյանը, հավաքները դառնում են 25-օրյա. «7 օր քաղաքացին անցնում է պատրաստություն, 14 օր իրականացնում է մարտական հերթապահություն»։
Նրա խոսքով, շուտով կարգը կլինի և առաջիկա հավաքները կլինեն 25-օրյա. «Եւ դա կլինի պարտադիր ՀՀ բոլոր զինապարտ քաղաքացիների համար»։ Նախարարը նաև տեղեկացրեց, որ քաղաքացիներին հնարավորություն կտրվի ընտրել հավաքի ժամկետը։
ՀՀ վարչապետ Նիկոլ Փաշինյանն էլ հայտարարեց, թե շատ երկար ժամանակ պահեստազորը չէր հրավիրվել եռամսյա հավաքների և իրենք որոշել են եռամսյա հավաքների քաղաքականություն իրականացնել.
«Այդ ընթացքում պարզվեց, որ խնդրահարույց է, քանի որ մարդիկ աշխատում են: Որոշեցինք հրավիրել այն մարդկանց, որոնք աշխատանք չունեին՝ դրանով լուծելով սոցիալական խնդիր, քանի որ եռամսյա հավաքի մասնակիցները նաև վճարվում են, բայց հետագայաում եկանք եզրակացության, որ արդյունավետ չէ, և որոշեցինք այն դարձնել մեկամսյա և պարտադիր բոլորի համար»:
