Գյումրու պատվավոր քաղաքացիների թիվն ավելացավ ևս մեկով։ Հայաստանի Հանրապետության վաստակավոր ճարտարապետ, ծնունդով գյումրեցի Սաշուր Քալաշյանին Գյումրու ավագանու որոշմամբ այսօր «Գյումրու պատվավոր քաղաքացի» կոչում շնորհվեց։
Սաշուր Քալաշյանը 1977-1992 թվականները եղել է Լենինականի գլխավոր ճարտարապետը։
Կոչումը նրան շնորհվեց Գյումրու կառուցապատման, պատմամշակութային ժառանգության պահպանման, վերականգնման, ճարտարապետության և քաղաքաշինության զարգացման մեջ ներդրած նշանակալի ավանդի, երկարամյա բեղմնավոր գործունեության և ունեցած վաստակի համար։
Դահլիճում ներկա վաստակավոր ճարտարապետը հուզված մոտեցավ ամբիոնին ու ասաց՝ պահն իր համար անակնկալ էր։
«Այսօր Գյումրի այլ նպատակով էի եկել, բայց պարզվեց, որ առանց իմ նախնական համաձայնության նման որոշում է կայացվել։ Մեծ պատիվ է սա, շնորհակալ եմ»,- ասաց Քալաշյանը։
Գյումրու պատմական միջուկի պահպանության և Կումայրի արգելոց-թանգարանի հիմնման ակունքներում է կանգնած Սաշուր Քալաշյանը, որի ջանքերի շնորհիվ այսօր հանրապետության երկրորդ քաղաքը պահպանել է պատմական շունչն ու ճարտարապետությունը։
