Ուկրաինայի նախագահ Վլադիմիր Զելենսկին իր ամենօրյա տեսաուղերձում հայտնել է, որ ամենածանր մարտերն ընթանում են Սոլեդարի և Բախմուտի շրջակայքում։ Նրա խոսքով՝ ուկրաինացիների դեմ Ռուսաստանը մարտի դաշտ է նետել բոլոր նրանց, ում կարող էր, այդ թվում՝ երկու հազար կալանավորի.
«Դրանք ծանր հանցագործությունների համար պատժի մեծ ժամկետներով կալանավորներ են։ Ռազմաճակատում նրանց պահում են ոչ միայն փողով, այլև համաներման խոստումով։ Ահա այսպես է ռուսական պետությունը հովանավորում ահաբեկչությունը, բանտերում մարդասպաններ է փնտրում և նրանց ազատություն խոստանում, եթե նրանք կրկին սպանեն»,- ասել է Զելենսկին։ Նրա խոսքով՝ աշխարհում գրեթե ոչ ոք չի կասկածում, որ Ռուսաստանին պետք է ահաբեկիչ պետություն ճանաչել։
