Ադրբեջանի Արտաքին գործերի նախարարությունն արձագանքել է ՀՀ վարչապետ Նիկոլ Փաշինյանի թվիթերյան գրառմանը, որում Փաշինյանն անդրադարձել էր տարածաշրջանում հաղորդակցությունների բացման թեմային ու նշել, որ ադրբեջանական կողմից արձագանքներ չկան:
Ըստ ադրբեջանական արտաքին քաղաքական գերատեսչության, «Հայաստանը կեղծ պատրվակներ է հնարում» ու փորձում շրջանցել հիմնական պայմանավորվածությունները:
Ադրբեջանի ԱԳՆ-ն այս համատեքստում կրկին հիշատակել է միջանցքի մասին թեման, որի վերաբերյալ, ինչպես հայտնի է, չկա որևէ կետ նոյեմբերյան եռակողմ փաստաթղթում և հետագա բոլոր պայմանավորվածություններում:
«Հայաստանը պետք է հրաժարվի կեղծ պատրվակներից, որոնցով փորձում է խուսափելու 2020 թվականի նոյեմբերի եռակողմ հայտարարությամբ ստանձնած իր պարտավորություններից «Զանգեզուրի միջանցքով» ավտոմոբիլային ու երկաթուղային ճանապարհները միացնելու վերաբերյալ:
Անցակետերի 3 անիրատեսական տարբերակներ առաջարկելը՝ անտեսելով 20 ամիս տևած բանակցությունները, այնքան էլ լավ քաղաքականություն չէ»,- ասվում է Ադրբեջանի ԱԳՆ թվիթերյան գրառման մեջ։
Հիշեցնենք՝ ըստ ՀՀ վարչապետի այսօր թվիթերում արված գրառման, Արևելյան Ադրբեջանի և Նախիջևանի միջև կապն ապահովելու նպատակով հայ-ադրբեջանական սահմանին 3 անցակետ բացելու մասին ՀՀ կառավարության որոշման նախագիծը մի քանի ամիս պաշտոնապես շրջանառվում է, սակայն Հայաստանի կառավարությունը մինչ հիմա սպասում է Ադրբեջանի դրական արձագանքին:
