Թուրքիայի արտգործնախարար Մևլութ Չավուշօղլուն երկուշաբթի օրը հայտարարել է, որ Անկարան ցանկացած հարթակում պատրաստ է Հայաստանի հետ երկխոսության և անկեղծ է նրա հետ հարաբերությունների կարգավորման գործընթացում։
«Մենք ցանկացած հարթակում պատրաստ ենք Հայաստանի հետ բանակցությունների, չենք տեսնում բաներ, որոնք կխոչընդոտեն երկխոսությանը»,- ասել է թուրք նախարարը Ստամբուլում՝ թյուրքական պետությունների կազմակերպության անդամ երկրների արտգործնախարարների հանդիպումից հետո կայացած մամուլի ասուլիսում։ Հեռարձակումն իրականացրել է TRT հեռուստաալիքը։
Չավուշօղլուն հաստատել է, որ հարաբերությունների կարգավորման հարցերով երկու երկրների հատուկ ներկայացուցիչներն այսուհետ հանդիպումներ կանցկացնեն ոչ թե երրորդ երկրների տարածքում, ինչպես նախկինում, այլ՝ Թուրքիայում կամ Հայաստանում. «Հատուկ ներկայացուցիչներն իրենք կպայմանավորվեն, թե որտեղ և երբ հանդիպեն. երրորդ երկրների կարիք չկա»։
