Հայաստանի հետ հարաբերությունների կարգավորման գործընթացում առաջընթաց կա: Այս մասին հայտարարել է Թուրքիայի նախագահի մամուլի քարտուղար Իբրահիմ Քալընը։
Նա նշել է՝ Թուրքիան կարծում է, որ Հայաստանի հետ հարաբերությունների կարգավորման գործընթացում նոր քայլեր կձեռնարկվեն։ Քալընը հիշեցրել է, որ Թուրքիայի և Հայաստանի ղեկավարները հեռախոսազրույց են ունեցել, ապա՝ հանդիպել Պրահայում։
Վերջինս հավելել է, որ Հայաստանի կառավարությունը հիացմունքի արժանի քայլեր է ձեռնարկել, որոնց պետք է աջակցի նաև հայկական սփյուռքը։
«Փաշինյանը լավ է տանում այս գործընթացը՝ չնայած սփյուռքի հակազդեցությանը և ճնշումներին»,- ավելացրել է թուրք պաշտոնյան A Haber-ին տված հարցազրույցում։
Նրա խոսքով՝ անհրաժեշտ է առաջ շարժվել՝ քայլեր ձեռնարկելով Հարավային Կովկասում խաղաղության ու կայունության հաստատման ուղղությամբ։
