ՀՀ ոստիկանության պետի տեղակալ Արա Ֆիդանյանն այսօր լրագրողների հետ զրույցում պարզաբանել է 150 հազար դոլար ներդրում անողներին ՀՀ քաղաքացիություն տալու մասին նախագիծը։
Ըստ Ֆիդանյանի, սա նաև օրենքի նախագիծ է, և առավել մանրամասն դրույթներ կսահմանվեն ՀՀ կառավարության համապատասխան որոշմամբ, որի արդյունքում ռիսկերը կբացառվեն։
«Պետք է նշեմ, որ սահմանափակ թվով անձինք կարող են օգտվել այդ հնարավորությունից։ Օրենքում ազգություն, որպես այդպիսին, չենք կարող սահմանել, սակայն տարատեսակ բոլոր ռիսկերը հաշվի են առնվելու։ Սա ոչ թե միայն ոստիկանության նախաձեռնությունն է, այլ մի շարք գերատեսչությունների։ Պետք չէ ֆիքսվել միայն տնտեսության ոլորտի վրա։ Մենք սահմանել ենք գիտության, կրթության, սպորտի, մշակույթի ոլորտները ևս»,-ասել է փոխոստիկանապետը։
Ինչով է պայմանավորված ներդրման՝ 150․000 դոլար գումարի չափը։
Ֆիդանյանը նշել է, որ կան երկրներ, որոնք նույնպես ունեն այդպիսի հնարավորություններ, և որպեսզի հնարավոր լինի գրավչություն ապահովել, ապա պետք է նաև մրցակցությունն ապահովել նման երկրների հետ։
Արդյո՞ք Ադրբեջանի քաղաքացաություն ունեցող անձը կկարողանա ներդրման ճանապարհով ՀՀ քաղաքացիություն ստանալ։
«Շատ հարաբերական է Ադրբեջանի քաղաքացի ասվածը։ Նույն տրամաբանությամբ կարող է ազգությամբ ադրբեջանցի լինեն, բայց Ռուսաստանի Դաշնության քաղաքացիություն ունենան։ Հետևաբար բացառապես կենտրոնանալ քաղաքացիության գործոնի վրա, չենք պատրաստվում։
Մենք պետք է ուսումնասիրենք, վերլուծենք բոլոր ռիսկերը»,-պարզաբանել է Ֆիդանյանը։
