ՀՀ առողջապահության նախարար Անահիտ Ավանեսյանն այսօր լրագրողների հետ ճեպազրույցում անդրադարձել է այս տարվա հունիսին նախարարություն, ապա իր աշխատասենյակ ընդդիմադիր պատգամավորների ներխուժմանը։ Դրանից հետո նախարարությունը դիմել էր ՀՀ ԱԺ՝ պատգամավորների արարքը քննելու համար էթիկայի հանձնաժողով ստեղծելու համար։
Նախարարը վստահեցրել է, որ այս հարցում հետամուտ է լինելու. «Աշխատանք է ընթանում, որ այդ հանձնաժողովի կազմը որոշվի։ Առաջիկայում ԱԺ-ում աշխատանքային քննարկում ենք ունենալու աշխատակազմի ղեկավարի հետ՝ հասկանալու, թե ինչ ընթացքում է։ Ես, ինչպես ասել եմ, հետևողականորեն հսկելու եմ, որ ներկայացված դիմումն ի վերջո քննվի»։
Նախարարը նաև նշել է, որ իր հետևողականությունն ամենևին էլ վրեժի դրսևորում չէ. «Եթե մարդը դիմում է ներկայացնում, հայտ է ներկայացնում, պետք է հետևողականորեն հսկի դրան։ Ես կարծում եմ՝ սա ճիշտ մոտեցում է»։
