Ադրբեջանական կողմը դեռ չի տալիս համաձայնությունը, որ հայկական կողմը կարողանա հանել հայ զոհված զինծառայողների մարմինները:
ՀՀ կառավարության նիստից հետո տեղի ունեցած ճեպազրույցում այս մասին հայտնեց ՀՀ ՄԻՊ Քրիստիննե Գրիգորյանը՝ պատասխանելով լրագրողների հարցերին:
Նա նաև մանրամասնեց, թե ինչու են մի քանի օրվա տարբերությամբ տարբեր լինում անհետ կորածների թվերը:
«Ուշադրություն դարձրեք՝ տարբեր օրերին այդ թվերը կարող են փոխվել: Օրինակ՝ ամսի 16-ի դրությամբ միայն մեր գրասենյակ հարազատների, ընտանիքների կողմից ունեինք 40-ից ավելի դիմում, նրանք պնդում էին՝ իրենց հարազատն անհետ կորած է: Այդ ընթացքում մոտ 130 մարմին էր փոխանցվել, նույնականացման գործընթացի հետևանքով այս թվերը փոփոխվեցին:
Մյուս կողմից էլ ունենք կոնկրետ տեղանքներ, որտեղ պաշտպանության նախարարությունը գիտի զինծառայողների գտնվելու մասին, բայց այս պահի դրությամբ ադրբեջանական կողմը դեռևս չի տալիս իր համաձայնությունը, որպեսզի հայկական կողմը հանի մարմինները»,- ասաց Գրիգորյանը:
