Թուրքիայի արտգործնախարար Մեվլութ Չավուշօղլուն քննադատել է ԵԱՀԿ-ի որոշումը՝ Հայաստան «կարիքները գնահատող առաքելություն» ուղարկելու առիթով։
Ուրբաթ օրը ելույթ ունենալով Մերսին նահանգում՝ թուրքական դիվանագիտության ղեկավարը նշել է, որ ԵԱՀԿ-ն իրեն «անլուծելի խնդիրների կենտրոն» է հռչակել, իսկ Հայաստանի վերաբերյալ վերջին որոշումը հակասում է հենց կազմակերպության պահանջներին ու մանդատին։
«Սեփական դիրքորոշումը պարտադրելու փորձը և ստատուս քվոյի ձևավորումն անընդունելի է»,- ընդգծել է Չավուշօղլուն։
«Իսկ այսօր առաքելություն կամ դիտորդներ ուղարկելիս փորձում են անտեսել Ադրբեջանի դիրքորոշումը։ Հայաստանին աջակցելու ցանկություն կա»,- ընդգծել է Չավուշօղլուն։
Միաժամանակ, Չավուշօղլուն նշել է, որ Բաքվի և Երևանի միջև երկխոսության ցանկացած դրական զարգացում դրական է ազդում Թուրքիայի և Հայաստանի բանակցությունների վրա։ «Ի վերջո, ամենաշատը կշահի հենց Եվրոպան»,- հավելել է Չավուշօղլուն:
