Իրանի Իսլամական Հանրապետությունը հերքում է Ղրիմում իրանական ուժերի ներկայության մասին լուրերը։ Այս մասին երկուշաբթի օրը հայտարարել է Իրանի ԱԳՆ պաշտոնական ներկայացուցիչ Նասեր Քանանին։
«Մենք հերքում ենք Ղրիմում իրանական ուժերի ներկայության մասին տեղեկությունը»,- նշել է Քանանին՝ հավելելով, որ այս տեղեկությունը ԶԼՄ-ների կողմից տարածվում է՝ շեղելու ուշադրությունը ուկրաինական պատերազմում Արևմուտքի կործանարար դերից:
Քանանին նաև հերքել է Իրանին ուղղված Արևմուտքի մեղադրանքները՝ Ռուսաստան անօդաչու թռչող սարքեր ուղարկելու վերաբերյալ, որոնք կօգտագործվեն Ուկրաինայում մարտերի ընթացքում։
«Ամերիկան և Եվրոպան սադրիչ գործողությունների միջոցով ստեղծեցին պայմաններ, որոնք հանգեցրին Ուկրաինայում պատերազմի բռնկմանը, իսկ հիմա կեղծ տեղեկություններ տարածելով մեղադրում են Իրանին։ Մենք Ուկրաինայի հակամարտության կողմ չենք և զենք արտահանող չենք։
Իրանի և Ռուսաստանի հարաբերությունները համապարփակ հարաբերություններ են տարբեր ոլորտներում, զարգացող և հիմնված երկու երկրների շահերի վրա և չեն հակասում որևէ միջազգային կանոնի։ Երկրներն ազատ են զարգացնելու իրենց հարաբերությունները՝ ելնելով իրենց շահերից»,- նշել է ԱԳՆ պաշտոնական ներկայացուցիչը։
