Ռումինիայի պաշտպանության նախարար Վասիլե Դինչուն հրաժարական է տվել՝ հայտարարելով, որ չի կարող համագործակցել երկրի նախագահի հետ՝ ճնշումների ֆոնին այն բանից հետո, երբ ինքն ասել է, որ պատերազմը դադարեցնելու Ուկրաինայի միակ հնարավորությունը Ռուսաստանի հետ բանակցելն է, հայտնում է Reuters-ը։
«Իմ հրաժարականը պայմանավորված է Ռումինիայի նախագահի, բանակի գլխավոր հրամանատարի հետ համագործակցության անհնարինությամբ»,- ասվում է Դինչուի հայտարարության մեջ: «Կարծում եմ, որ պաշտոնից իմ հրաժարականն անհրաժեշտ է, որպեսզի վնաս չհասցվի այն որոշումներին ու ծրագրերին, որոնք պահանջում են ճկուն հրամանատարական շղթաներ, այլ ոչ թե մի շարք նախագծերի խոչընդոտում, որոնք բացարձակապես անհրաժեշտ են… նախարարության եւ բանակի համար»:
Հոկտեմբերի սկզբին Դինչուն հայտարարել էր, որ Ուկրաինային անհրաժեշտ են միջազգային դաշնակիցներ՝ Ռուսաստանի հետ անվտանգության եւ խաղաղության երաշխիքների շուրջ բանակցելու համար, ինչը քննադատել էին նախագահ Կլաուս Յոհանիսը եւ իշխող կոալիցիայի առաջնորդները: Ավելի ուշ նա հայտարարել էր, որ իր մեկնաբանությունները կտրվել են համատեքստից:
Յոհանիսն ասել է, որ ուկրաինացիները պատերազմի համար վճարում են արյունով, եւ միայն նրանք կարող են որոշել, թե ինչի շուրջ ու երբ բանակցեն, եւ այդ դիրքորոշմանն աջակցում են Ռումինիան եւ ԵՄ-ն։
