Բջջային խաղերի եվրոպական արտադրող AppQuantum-ը վերջնականապես լքում է Ռուսաստանը։ Ընկերությունը Ռուսաստանում մնացած աշխատակիցներին և կապալառուներին տեղափոխում է Կիպրոսի գրասենյակ, ինչպես նաև Հայաստանում և Ղազախստանում բացված նոր գրասենյակներ։
Առայժմ մանրամասն տեղեկություններ չկան, թե քանի աշխատակից կտեղափոխվի Հայաստան և կոնկրետ երբ դա տեղի կունենա, սակայն նման տեղեկություն, հավանաբար, կհայտնվի ավելի ուշ։ Հնարավոր է, որ Հայաստանում ընկերության գրասենյակի բացումը նոր հնարավորություններ ստեղծի նաև տեղական ծրագրավորողների և այլ մասնագետների հետ համագործակցության համար։
Ընկերությունը հեռավար համագործակցության ձևաչափ կառաջարկի այն աշխատակիցներին, որոնք կորոշեն տեղափոխվել մի երկիր, որտեղ AppQuantum-ը գրասենյակ չունի։ Փաստացի նրանք կարող են աշխատել աշխարհի ցանկացած կետից:
Ընկերությունից հայտնում են, որ աշխատակիցների տեղափոխման գործընթացն իրականացվել է աստիճանաբար՝ ոչ ոք չի շտապել, բոլորին ժամանակ է տրվել արտերկիր տեղափոխվելուն պատրաստվելու համար։ Ռուսաստանում արդեն չկան ընկերության հետ փոխկապակցված իրավաբանական անձինք:
Նշենք, որ AppQuantum-ը, որը հիմնադրվել է 2017 թ․, մշակում է բջջային խաղեր, որոնք ողջ աշխարհում ներբեռնել են 100 միլիոնից ավելի օգտատերեր: Ընկերության ամենահայտնի խաղերից են Dragon Champions-ը և Gold & Goblins: Idle Merger-ը: Առաջինը թողարկումից հետո 29 օրում բերել է $1,000,000 եկամուտ, իսկ երկրորդը թողարկումից հետո 3 ամսում բերել է $7,000,000 եկամուտ։
Աղբյուրը՝ tech.news.am
