ՌԴ նախագահ Վլադիմիր Պուտինի եռակողմ հանդիպումը Հայաստանի վարչապետ Նիկոլ Փաշինյանի եւ Ադրբեջանի առաջնորդ Իլհամ Ալիեւի հետ նախապատրաստվում է, ժամանակի եւ վայրի մասին ավելի ուշ կտեղեկացնեն, լրագրողներին ասել է ՌԴ նախագահի մամուլի քարտուղար Դմիտրի Պեսկովը, հաղորդում է Ռիա Նովոստին։
«Մենք արդեն ասել էինք, որ նման եռակողմ հանդիպում է նախապատրաստվում։ Հույս ունենք, որ այն կկայանա։ Ժամանակի եւ վայրի մասին նույնպես լրացուցիչ կտեղեկացնենք»,- ասել է Պեսկովը՝ պատասխանելով հարցին՝ արդյոք հոկտեմբերի 31-ին նախատեսվում է եռակողմ հանդիպում Ռուսաստանի, Հայաստանի եւ Ադրբեջանի միջեւ։
Ավելի վաղ հայտնել էինք, որ խորհրդարանի խոսնակ Ալեն Սիմոնյանը լրագրողներին ասել էր, որ վարչապետ Նիկոլ Փաշինյանը հոկտեմբերի 31-ին կարող է մեկնել Սոչի՝ Ռուսաստանի եւ Ադրբեջանի առաջնորդներ Վլադիմիր Պուտինի եւ Իլհամ Ալիեւի հետ հանդիպմանը մասնակցելու համար։
