Կառավարությունը վերանայեց սեյսմիկ անվտանգության բարելավման ծրագրում ընդգրկված՝ սեյսմիկ տեսանկյունից առավել վտանգավոր առկա դպրոցների ցանկը՝ հաշվի առնելով պետական բյուջեի և այլ գործընկեր կազմակերպությունների աջակցությամբ արդեն իսկ կառուցված, վերակառուցված կամ հիմնանորոգված կրթօջախները։
ՀՀ տարածքային կառավարման և ենթակառուցվածքների նախարար Գնել Սանոսյանը տեղեկացրեց, որ 2014-2015թթ. Հայաստանում տեղի է ունեցել դպրոցների ուսումնասիրություն.
«Առանձնացվել է 437 շենք, որ ունեն սեյսմիկ խնդիրներ ու կարիք կա հիմնանորոգման, ամրացման կամ նոր կառուցման։ Եւ այս տարիներին իրականացված ծրագրերով այդ 437 դպրոցներից 63-ում տեղի է ունեցել շինարարություն, որոնց մեծ մասն ավարտված է»։ Ըստ Սանոսյանի, կառավարության այս որոշմամբ 437 դպրոցների ցանկից հանում են նրանք, որ այլևս սեյսմիկ չեն, դրանց համար նոր շենքեր են կառուցվել։
ՀՀ վարչապետ Նիկոլ Փաշինյանն էլ խոսեց ՀՀ-ում իրականացվող դպրոցաշինության ծրագրերի մասին, նշելով.
«Մենք մի շարք գյուղերում կառուցում ենք դպրոցներ, որտեղ վերջին 30 տարում հանրային նշանակության ոչ մի շինարարություն չի եղել: Այդ շենքերը պետք է ապրեն: Արգինա համայնքում փառահեղ շենք է կառուցվում, բայց այդտեղ միայն դպրոցական ծրագիրը քիչ կլինի, պետք է համայնքային կյանքի կազմակերպման կենտրոններ դարձնել»:
Նրա խոսքով, մինչև 2026 թվականի սեպտեմբերի 1-ը 337-ից ավելի դպրոց և 521 մանկապարտեզ է կառուցվելու.
«2023 թվականի հունվարի 1-ին մենք շահագործման կհանձնենք 24 դպրոց և 53 մանկապարտեզ»:
