ՀՀ վարչապետ Նիկոլ Փաշինյանը ՔՊ համագումարում ունեցած ելույթում անդրադարձել է Սոչիում ՌԴ նախագահ Վլադիմիր Պուտինի նախաձեռությամբ կայանալիք եռակողմ հանդիպմանը։
Փաշինյանը վստահեցրել է․ «Ես պատրաստ եմ Սոչիում ստորագրել փաստաթուղթ և ընդունել, որ ռուս խաղաղապահների ներկայությունը ԼՂ-ում անվերապահորեն երկարացվի 10-15-20 տարով»։ Փաշինյանը, նաև առաջարկել է, որ ՌԴ նախագահն ինքը հանդես գա նման առաջարկով, կամ եթե ինքը նման առաջարկ անի, ՌԴ–ն պաշտպանի այդ առաջարկը․ «Բայց ես դա չեմ կարող որոշել ՌԴ փոխարեն, որ խաղաղապահները մնան այնտեղ անորոշ ժամկետով»։
Փաշինյանը նաև հարց է հնչեցրել, թե մյուս կողմից պետք է իմանան, թե ինչ են անում ռուս խաղաղապահները ԼՂ–ում։ Այս համատեքստում նա անդրադարձել է Փառուխի դեպքերին, շեշտելով․«Փառուխի դեպքերը չենք մոռացել: Բարձր մակարդակով եղել է պայմանավորվածություն, որ ադրբեջանցիները պետք է դուրս գան ռուս խաղաղապահների պատասխանատվության գոտուց: Այդ խոստումն ու հանձնառությունը մինչև այժմ չի կատարվել»:
