ԱԺ «Քաղաքացիական պայմանագիր» խմբակցության պատգամավոր, ՔՊ վարչության անդամ Ռոմանոս Պետրոսյանը ֆեյսբուքյան իր էջում գրել է.
«Այս վարչությունը թվով չորրորդն է ՔՊ կուսակցության հիմնադրումից ի վեր, որոնց կազմերում պատիվ է ունեցել անընդմեջ վերընտրվելու՝ որպես կուսակցության ղեկավար կազմի ներկայացուցիչ:
«Խորին շնորհակալությունս եմ հայտնում իմ գաղափարական ընկերներին, թիմակիցներիս, մասնավորապես, վեցերորդ Համաժողովի բոլոր պատվիրակներին՝ նման բարձր վստահության եւ պարտավորեցնող մանդատի համար։
Աներկբա է. շարունակելու եմ քաղաքական եւ հասարակական գործունեությունս՝ բացառապես հանուն Հայաստանի Հանրապետության եւ մեր ժողովրդի։
Պետական եւ հանրային կառավարման ցանկացած կարգավիճակում (կամ՝ առանց դրա) գերնպատակս է՝ կառուցել օրենքի եւ իրավունքի գերակայության, քաղաքացիակենտրոն, կենսունակ ազգային պետություն։
Իսկ կուսակցական գործունեության հարթության մեջ եղել եւ մնալու եմ Քաղ.պայմանագրի՝ բացառապես բոլոր համակիրների, կուսակցական անդամների, տարածքային կառույցների, ՏԻՄ-երում ներկայացված՝ ավագանու խմբակցությունների եւ կուսակցական այլ մարմինների լիազոր-ներկայացուցիչը Կուսակցության վարչության կազմում՝ պատրաստակամ բարձրաձայնելու ցանկացած տեսակետ Վարչության հարթակում, մասնակցելու քաղաքական որոշումների կայացմանը, ստանձնելու պատասխանատվություն, իրացնելու քաղաքական որոշումների՝ ինձ վստահված չափաբաժինները, ինչպես նաեւ՝ անմնացորդ ջանք ներդնելու կուսակցության Կանոնադրությամբ եւ Ծրագրով նախանշած նպատակների իրագործման համար։
Աստված պահի Հայաստանը»,- գրել է Պետրոսյանը։
